Бозата и ќебапите во Сараево

Во споредба со скопската (од „Апче“ како репер), сараевската боза е со посветла боја, со наклонетост кон жолта.  Вкусот е малце покиселкаст, не оди во насока на оној пченкарен заостанат вкус во задниот дел на устата како бугарската. По текстура е слична, но не толку густа. Цена на чаша што кај нас се вика средна е 1,5 марки - околу 0,75 евра.

Боза во Башчаршија

Сараевските ќебапи се прилично слични на скопските. Најпозната ќебапчилница е „Жељо“ во Башчаршија, а наводно е и најскапа. Работниот народ од тој крај јаде во други - ги има многу во околината, иако во нив и ќебапчињата биле нешто помали.

Надвор од Башчаршија, најпрепорачлива е кебапчилницата „Змај“, веднаш до Железничката станица. Цена за десет ќебапи со лепиња и кромид и јогурт (локален обичај) е 7 марки, односно 3,5 евра.

Ќебапи во лепиња со кромид и јогурт во „Змај“

Мини ес-еф приказни

Неколку (пре)кратки научнофантастични раскази...

Фредерик Браун (1948)
Чук Чук
Последниот човек седеше сам во собата. Некој чукна на вратата.


Џеф Ренер (1964)
Љубовна приказна
Момчето ја сретнува девојката,
момчето ја губи девојката,
момчето ја прави девојката.


Роџер Дили (1972)
Најкратката SF приказна
Времето застана. Вчера.


Форест Акерман (1973)
Атомигедон 2419
Крај.


Ед Вален (1974)
Ева да не затруднеше
.




Превод и адаптација: Филип Стојановски. Македонскиот превод првобитно објавен на www.agora.org.mk.

Список со работи што ви требаат за да пречекате бебе - новороденче

Списоков на работи кои треба да ги имате дома кога ќе ви се роди бебе се пренесува од колено на колено, односно од инбокс на инбокс веќе неколку години. Не знам кој е авторката или авторот, мене пред неколку години ми го прати еден другар кога ни требаше.

Го пренесувам како што си беше, нелекторирано и со сите субјективни забелешки кои му даваат посебен шарм. Веројатно првобитно бил дел од порака по е-пошта, а сега е дел од фолклорот. Може ќе се најде некому.

1. 30-40 пелени
2. 10-12 шведски пелени
3. 1-2 капчиња
4. 5 боди на врзување (бр. 56) и 1-2 боди на врзување (бр. 62 за преоден период)
5. 2 пешкири
6. 4 пара чорапчиња
7. 4 шпилхозни (бр. 56) и 2 шпилхозни (бр. 62)
8. 2 горни бенкици (блузички)
9. 3-4 мали лигавчиња
10. 2 прекривачи или ќебенца
11. 2постелнини
12. пелена за преслекување
13. релаксатор
14. количка
15. baby alarm
16. анатомска кадичка
17. корпа или плико (за почеток)
18. 3% хидроген
19. бивацин прашок
20. Павловиќева крема (оригинална)
21. јекодерм
22. гази
23. Д3 капки
24. марамици (моја препорака Нивеа лосион)
25. сапунче за бањање (за првите 2 месеци)
26. Pampers 2 (3-6 кг)
27. 2-3 цуцли лажалки (Nuk1 од каучук, анатомаки од 0-6 месеци)
28. мало шишенце со цуцла-пластично од 125 мл (Nuk 1 со цуцла од каучук, анатомаки од 0-6 месеци)
29. чај од анасон (Бекутан чај за бебиња)
30. четка за коса
31. ножички за нокти
32. термометар за бебиња
33. чепкалки за уши за бебиња со граничник
34. физиолошки раствор за носе
35. прслуче за доење (Chicco или Lisca)
36. влошки за прслучето
37. влошки со мрежичка
38. специјалното издание на списанието Беба „Новороѓенќе“

П.С. Фластери или гази за пупачето за кога ќе го бањате не ви треба бидејќи може да се мокри доколку го бањате (туширате) под проточна вода а не го потопувате во кадичка додека не му падне.

И по протестот, претседателот влегува на задна врата

Денес, на 9 мај - Денот на победата на фашизмот што веќе официјално не се слави во Македонија, беше одржан протест за слобода на изразувањето. Местото беше пред Делегацијата на ЕУ во време кога таму имаше закажан прием по повод 9 мај - Денот на Европа, на кој присуствуваа високи државни функционери и дипломатскиот кор. Така, при влегување тие имаа прилика да се видат со активистите и да ги прочитаат или чујат пораките за слобода и демократија, а против цензурата која се воведува со новиот Закон за медиуми.

Не изброив колку точно луѓе протестираа, имаше неколку десетици, сигурно над 50-60 луѓе (да речеме од третина до половина од пријавените на Фејсбук ивентот). Многу брзо се наредија скоро исто толку униформирани полицајци, по околните тротоари и кај семафорите се испаркираа полициски возила, а учесниците кажуваа и дека во блиската околина има и многу полицајци во цивил.

По завршувањето на протестот, поминувајќи покрај задниот влез на Делегацијата на ЕУ, го видов претседателот на РМ Ѓорге Иванов како цел окезен крадешкум влегува внатре, да земе учество на приемот организиран од амбасадорот Орав.

Линкови во врска со настанот:

• Повикот од Фронтот за слобода на изразување
• А1он: (Видео) Протест во Скопје: „Смрт на фашизмот – слобода на изразувањето“ 
• Плус инфо: Галерија: Протест пред канцеларијата на ЕУ поради законот за медиуми
• Порталб:  Protestuesti shprehën revoltin para selisë së Bashkimit Evropian 'Vdekje fashizmit, liri të shprehjes
• Либерта Институт и НИСМА:  Поддршка за медиумите е обврска од ОРД | Përkrahja e mediave obligim nga MKO

„Не“ - поучен филм за рушењето на диктатурата во Чиле

На Скопскиот филмски фестивал може да го гледате чилеанскиот филм „Не“ (анг. No), во кој се раскажува за падот на диктатурата на генералот Пиноче во доцните осумдесетти благодарение на референдум.

Филмот беше прикажан во сабота и ќе има уште една проекција и во четврток од 20 ч. во кино Милениум.

Филмот раскажува за медиумската кампања од по 15 минути на ден која режимот ја дозволил како предуслов референдумот да биде признаен од меѓународниот фактор. Кампањата била „врв на ледениот брег“ на повеќегодишните напори на здружената опозиција чија основна цел била да се надмине стравот и апатијата кај народот. Требало да излезат да гласаат доволен број луѓе за да се спречат очекуваните манипулации од власта која имала тотална контрола. Пристапот бил пример на инклузивност и земање предвид и на загриженоста на луѓето кои по своја волја или под присила биле соработници на режимот.

 

Во филмот се користени снимки од оригиналната кампања кои се одлично вклопени, оти целиот е сниман со ТВ-техника.

Повеќе инфо (што може да го прочитате откако ќе го гледате филмот заради драмски ефект):

• 4 Things the Movie 'NO' Left Out About Real-Life Chile (The Atlantic)
• Chile’s “NO” Campaign: What the Movie Doesn't Tell Us (NACLA)
• Oscar-Nominated ‘No’ Stirring Debate in Chile (New York Times)
• Why Gael Garcia Bernal said yes to the Chilean film No (The Globe and Mail)

Барање за подигање споменик на храброто момче Мухамед Али Јашари

До кандидатите за градоначалник на Град Скопје и општините Карпош и Центар

Ние, граѓаните, бараме кандидатите за градоначалник на град Скопје и општините Карпош и Центар, пред вториот круг на локалните избори, да ветат дека без разлика кој ќе победи, нивната локална самоуправа ќе подигне барем едно скромно спомен-обележје во општина Карпош кај ГУЦ и во центарот на Скопје со кое ќе се зачува споменот на човештината на ученикот Мухамед Али Јашари (1992-2011) кој го загуби животот бранејќи го својот другар од насилници.

Зачувувањето на споменот на реалниот подвиг на загинатото момче, кој беше игнориран при доделување на сите релевантни државни признанија за храброст и придонес кон заедницата, ќе придонесе за зголемување на единството меѓу сите луѓе кои живеат во денешно Скопје и општо, во Република Македонија. Така и на другите деца ќе им се даде светол пример на нивни врсник кој не подлегнал на националистичките пропаганди за етнички поделби.

Искажете поддршка за оваа иницијатива со тоа што ќе го споделите, ќе го ископирате текстот на повикот на вашиот профил, веб-сајт или блог, ќе го твитнете или ретвитнете, или проширите јавно на било кој друг начин.

---

Пренесувања на овој апел: Фејсбук, Твитер, Твитлонгер, блогот Illusional Reality, Нова ТВ, А1он.

При пренесување на Фејсбук и Твитер, најдобро е да ги тагнувате (tag) односно споменувате (mention) релевантните политичари.

Скопје 2014, споменикот на Цар Самуил: Печатни грешки излеани во бронза

Еден од примерите за фушерај во проектот Скопје 2014 е и плочата со објаснување пред споменикот на Цар Самуил. Плочата е излеана во бронза, на македонски и англиски јазик.

 
Преводот е прилично буквален, со конструкции на реченици целосно пресликани од македонскиот и како такви прилично несмасни ако се споредат со вообичаените на англиски.

Очигледно е дека пред да се излее во бронза текстот никој не го погледнал два пати, дури ни самиот преведувач. Кај делот за автокефалноста има и апла печатна грешка кај што им останало и некое претходно „autoce-“ пред „autocephalous“. Во нормални околности ваков запис, наменет да остане трајно и вечно да комуницира со странските гости, би требало да го погледне и локален стручњак (лектор-коректор) и можеби роден говорител на целниот јазик. А овде не бил вклучен ни автоматски спелчекер.

Под претпоставка дека поставувањето вакви споменици е оправдано, одговорните би морале да одговараат и за самата презентација на содржината и изборот на јазици. Дискутабилно на пример зошто баш се фалиме со пљачкашкиот поход и уништувањето на Задар, а не е спомнат грабежот на Лариса. Покрај основниот македонски е избран само неслужбениот англиски, наспроти на пример албанскиот со кој би помогнало да се индоктр... образуваат голем дел од локалните жители и е службен на ниво на Скопје. Контекстот на Самуил го прави интересен и за туристите од соседните балкански земји, па би било логично и ним на нивниот јазик да им се промовира официјална верзија на историјата, што е суштинската причина за дигањето на тој споменик, меѓу другите.

Башка што има тука и фактички „недоследности“, за разлика од Саудиска Арабија која е наречена според владеачкото семејство, државата не се викала Самуилова - референца која се користи во современото македонско творештво по 1945 година, ниту Гаврило-Радомирова според син му и наследникот после смртта на основачот... Но тоа е друг муабет.

Квазиисторија: Аристотел демек го учел Александар за демократија

Во градот Скопје, на брегот на реката Вардар, под лавот од типот „Грингер“ најблизок до Кале, има релјеф на кој навидум се прикажани филозофот Аристотел и младиот принц Александар на час. Аристотел држи свиток на кој пишува „ΔEMO КРАТИYАТА Е ОСНОVA НА СΛОBOΔATA“ што би можело да се прочита „Демократијата е основа на слободата“. 

Антички ученик кој наликува на идниот крал Александар III и
антички учител кој наликува на филозофот Аристотел на релјеф од Скопје 2014.

Нема податоци за тоа кој е Накнадно дознав дека Коки Јанев е авторот на ова пропагандистичко дело од проектот Скопје 2014, но поуките што ги пренесува се тотално спротивни на историските податоци. Од општа култура ми изгледаше нелогично да се прилепува учење за слобода и демократија на кралот Александар, чија цела кариера се базирала на воспоставување и одржување апсолутна власт. Тој не само што се сметал за апсолутен земски владетел, туку се сметал и за бог, или барем во поскромните моменти, син на бог.

За повеќе информации за Аристотел се обратив и до проф. д-р Катерина Колозова од Институтот за општествени и хуманистички науки, оти знаев дека нејзиниот научен опус опфаќа и анализи на тој историски период. На пример, едно од нејзините дела е книгата „Хелените и смртта“. Таа ми пиша:

„Ако учителот на овој релјеф навистина треба да го претставува Аристотел, би му препорачала на авторот да прочита нешто од Аристотел или, барем, да истражи на интернет. Аристотел ја темели својата политичка мисла на критика на демократијата и ја брани идејата на аристократскиот/монархистички поредок.“

 Македонските кралеви кои подоцна станале и персиски шахови власта ја практикувале тотално недемократски. Александар, а и татко му, отворено се однесувале деспотски и тирански, а нивното кралство и немало некаква робовладетелска демократска традиција како некои грчки градови-држави или Рим. На пример, додека слободата на говор била една од основите и на античките демократии, Александар во една прилика со своја рака го убил еден од најблиските пријатели, Клит, затоа што му пререкол. 

Треба да поверуваме дека во античко време луѓето зборувале на денешен македонски јазик само користеле комбинација на писма од тоа време и од иднината? Кирилицате е измислена повеќе од 1000 години подоцна.

Дополнително нелогичен е и начинот на претставување на „поучниот“ натпис со измешани 3 писма: латиница, кирилица и грчко. На релјефот е прикажано и сонце кое личи на античко македонскиот симбол кој би требало да има 16 краци, но ова има само 8.

Релјефот на предната страна на истото подножје на статуата на лав.

Релјефот на спротивната страна, свртена кон коловозот на бул. Гоце Делчев.

Македонија е ранлива на климатските промени, според ДАРА

Меѓународната невладина организација ДАРА објави ново издание на нивниот Монитор на ранливост на климатските промени

Country-specific #climate vulnerability data now online - SciDev.Net bit.ly/W2u0LZ #GeekyTreasures
— R (@MaliciaRogue) March 11, 2013

Според анализата на ДАРА за Македонија [en], до 2030 година како резултат на климатските промени и однесувањето на луѓето во неа, се очекува да доминираат:

• суши
• свлечишта
• уништен жив свет (тоа е она biodiversity)
• загадување за кое нема шанса да се исчисти
• болести поврзани со жештина и студ
• колапс на земјоделие и шумарство
• катастрофална состојба на сè поврзано со вода и за пиење и за хидроцентрали

На оваа тема пишував и порано, кога излезе анализата од УНДП за влијанието на климатските промени врз македонската економија.

Фала ви на сите што сте на позиции да одлучат за тоа што е приоритетно што се грижите за работите што навистина влијаат на животот на луѓето што (ќе) живеат во Македонија.

Со кои хероини пораснав? - денес на Вечерите на женски права

Вечерва, на 8 март 2013 година во 20 часот во Кинотека на Македонија ќе се одржи првиот дел од Вечерите на женски права во организација на агенцијата на ООН за жени „UN Women“ (Фејсбук настан).

Темата на четвртото издание на „Вечерите на женски права“ е претставувањето на сликата за/на жената во медиумите, во кое ќе се проектираат три документарни филма од поновата светска продукција, проследени со тематски дискусии, изложба, и поетски перформанс.

Вечерва ќе биде прикажан документарниот филм  „Чудесни жени“ (Wonder Women!, САД, 2012, 62 мин.) во режија на Кристи Гевара-Фланаган во кој се зборува за „Нераскажаната приказна за американските хероини ја следи фасцинантната еволуција и наследство на Супер-жената [sic] (Wonder Woman).“ По прикажувањето на филмот ќе има и дискусија на тема: „Со кои хероини пораснав?“ во која ќе учествувам и јас како еден од панелистите.



WONDER WOMEN! The Untold Story of American Superheroines from Vaquera Films on Vimeo.


Идејата ми е да споделам дел од моите познавања на популарната култура од Македонија од времето на СФРЈ, особено од осумдесеттите години на 20 век, на пример:

• Во СФРЈ немаше посебни стрип изданија со Вондер вуман, но беше споменувана во контекст на Супермен и можеби Бетмен (лиценцирани изданија популарни ликови од истиот издавач). Мнозинството стрипови беа со машки ликови, особено најпопуларните шпагети вестерни.
• Од друга страна, жените како главни или рамноправни ликови беа присутни во развиената стрип-индустрија. Во дел од нив главните ликови беа во тимови/групи/семејства во кои понекогаш имаше и женски членови или противници претставени како еднакво способни. 
• Како носечки ликови. Во стриповите за деца Мини и Пата имаа сопствени стории (и често испаѓаа попаметни и поспособни од Мики и Пајо), а за поголемите редовни беа авантуристичките и научнофантастични стрипови како Модести Блејз, Акса, Црвена Соња, Свеа, Друна...
• Постоеше и југословенка суперхеројка, Кет Клоу (Cat Claw) која беше полупародија на американските суперхеројски стрипови со поексплицитна визуелна презентација.
• Го преведувам името како Чудесна Жена по аналогија на преседанот со преведот на името на нејзината помлада сестра Чудесната девојка (Wonder Girl) која беше присутна кај нас како дел од Нови Титани (Teen Titans) кои излегуваа во рамки на „Стрип Забавник“.

 

 

 

Папата Бенедикт XVI и папската оставка во научната фантастика

This post is also available in | Овој пост е достапен и на
- македонски преку Блогерај:  Папата Бенедикт XVI и папската оставка во научната фантастика
- English: Pope Benedict XVI and Papal Resignation in Science Fiction

Една научно-фантастична книга напишана во текот на животот на претходниот папа го има посочено Бенедикт XVI како негов наследник во 2009.

Книгата Флешфорвард (Flashforward) на канадскиот писател Роберт Џ. Сојер (Robert J. Sawyer) била напишана во 1995 година и објавена во 1999. Дел од дејствието се одвива во 2009 година и папата Бенедикт XVI се појавува во рамки на фиктивни вести од светот (на стр. 93 од изданието линкувано со сликичката). Вистинскиот Бенедикт XVI (Benedict XVI) беше востоличен за папа во 2005 година. 

In 1995, I predicted next Pope would be Benedict XVI. In 2000, I predicted Pope would resign. Wonder if Ratzinger has been reading my work?
— Robert J. Sawyer (@RobertJSawyer) February 12, 2013

Роберт Џ. Сојер твитна:

Во 1995 година, предвидов дека наредниот папа ќе биде Бенедикт XVI. Во 2000. предвидов дека некој папа ќе даде оставка. Се прашувам дали Ратцингер ги чита моите дела?

Сојер го направил второто „предвидување“ во краткиот расказ „Абдикацијата на папата Мери III“ ("The Abdication of Pope Mary III"), достапен на неговиот блог.

Википедија наведува неколку други научно-фантастични дела чија тема е папството:

• Во „In partibus infidelium“ („Во земјата на неверниците“) од полскиот автор Јацек Дукај (Jacek Dukaj), човештвото остварува контакт со други цивилизации кои патуваат низ вселената и христијанството, и тоа Католичката црква, се шири надалеку. Луѓето стануваат малцинство меѓу верниците и вонземјанин е избран за папа.
• Во Проект папа (анг. Project Pope) од 1981. Клифорд Симак (Clifford Simak) пишува за роботите од планетата Крајот на Никаде кои работеле илјада години да создадат компјутеризиран, безгрешен папа способен да ја открие крајната вистина. Нивното дело е присвоено кога човечки Слушач открива нешто што изгледа дека е планета Рај.

Уште едно неодамнешно дело (фикција, но не научна фантастика) кое се занимава со папска оставка е италијанската комедија од 2011 Habemus Papam, (Имаме папа или на англиски We Have a Pope) во која избраниот кардинал се колеба и ја одбива понудата да стане папа во текот на ритуалот на прогласување.

СМБЦ 06.10.2012. (стрип)

Извор: Saturday Morning Breakfast Cereal, 06.10.2012 од Зак Вејнер. Превод: Филип Стојановски. Објавено на блогот Развигор со дозвола на авторот.
© 2012 Zach Weiner. All rights reserved. Please ask Zach if you'd like to republish his works, incl. translations.

Како се потпишува „за Аман“ во Карпош

Собирањето потписи за предлогот за законски измени од граѓанската иницијатива Аман е сè уште во тек, рокот е до 30 јануари. На нивниот блог може да видите на кои локации може да дадете поддршка преку потпишување, зависно од општината во која сте регистрирани. На пример, ако сте од општина Карпош, Ѓорче Петров или Сарај, подрачната кацеларија на Државната изборна комисија (ДИК) е во Козле, до ГУЦ...

 Може да кликнете на сликите за поголема верзија. Ова ќе го видите ако го најдете местото. И за таа и за другите општини, може да се послужите со мапа. Преку настанот на Фејсбук активистите од Аман одговараат на сите дополнителни прашања.

Ако одите од Веро, возете накај Козле, па десно. 
Потоа ако влезете во улицата кај што е германска амбасада, вртите во прва лево.
Потоа го наоѓате ГУЦ и жолтата барака на ридот.

На вратата од бараката има известувања. Канцеларијата на ДИК е десно.

Известувањето од ДИК е напишано на рака.

Молба од ДИК на вратата: спремете лична карта или пасош.

Претходни постови за Аман на блогов:

• Препорака за блогери: Ставете банер од #АМАН
• Протести против поскапувањата во Скопје и Битола

„Слободни луѓе“ од „Јенки во дворецот на Кралот Артур“ од Марк Твен

„Јенки во дворецот на Кралот Артур“ од Марк Твен (1889) е една од првите научнофантастични дела кои се занимаваат со темите на патување низ времето и менување на општествени системи, во форма на сатира и бурлеска. Во неа, Американец од XIX век се наоѓа во Англија на почетокот на Раниот Среден Век и го набљудува, споредува и се обидува да делува активистички. Име на оригиналот A Connecticut Yankee in King Arthur’s Court (аудио книга и линкови до е-книга).

Фронтиспис (прва слика) од оригиналното издание од 1889 г., извор Википедија.

Извадок од Глава XIII, „Слободни луѓе“ во превод на Свето Серафимов, издание на Мисла, Скопје од 1984 година (стр. 99-101):

Овие кутри божемни слободни луѓе што ги споделуваа својот појадок и своите мисли со мене, беа толку покорни и понизни спрема својот крал, спрема Црквата и благородништвото колку што би можеле да посакаат нивните најлути непријатели. Во тоа имаше нешто жално смешно. Јас ги прашав дали претпоставуваат дека некогаш постоела нација која, со слободниот глас на секој човек, би избрала една единствена фамилија да владее со неа, а исто така и нејзините потомци, за вечни времиња, било да се надарени или глупаци, исклучувајќи ги сите други фамилии - вклучувајќи ги и оние што гласале; и дали би избрале извесни сто фамилии да бидат искачени на вртоглави врвови на господство и овенчани со стравотна наследна слава и привилегии, а сите други фамилии во нацијата да бидат исклучени од тоа - вклучувајќи ја и неговата.

Сите тие изгледаа зашеметени и рекоа дека не знаат; дека никогаш порано не размислувале за тоа и никогаш не им паднало на ум дека една нација би можела да биде така поставена што секој човек да може да го каже својот збор во управата. Јас реков дека имам видено една таква - и дека таа ќе се одржи додека не добие официјална државна Црква. Пак беа сите зашеметени - отпрвин. Но по малку еден ја дигна главата и побара уште еднаш да го повторам тоа; и тоа да го повторам полека, за да може да му се вреже во сеќавањето. Јас го сторив тоа: а по малку тој сфати, ја спушти тупаницата и рече дека тој не верува оти нацијата во која секој човек има право на глас кога и да било, доброволно би спаднала во таква кал и нечистотија; и дека прво и најголемо злосторство мора да е тоа, да ѝ се украде на нацијата волјата и правото да избира кого сака. Јас си реков на себеси:

„Овој е вистински човек. Кога би ме поддржувале достатно такви како него, јас би презел нешто за благосостојбата на оваа земја и би се обидел да докажам дека сум нејзиниот најпредан граѓанин со тоа што би извршил целосна промена на нејзиниот систем на управување.“

Видете, мојата лојалност е лојалност спрема земјата, не спрема нејзините институции или спрема нејзините официјални личности. Земјата е нешто вистинско, нешто суштинско, нешто вечно; таа е нешто врз кое треба да се бдее, за кое треба да се води грижа, спрема кое треба да се биде лојален; институциите се нешто надворешно, тие се просто облека, а облеката може да се износи, да се излити, да се искине и да престане да биде удобна, да престане да го штити телото од зимата, од болести, од смрт. Да се биде лојален спрема партали, да се умира за партали - тоа е неразумна лојалност, тоа е чисто животинско; тоа ѝ припаѓа на монархијата, тоа го пронашла монархијата; па нека го задржи монархијата. Јас бев од Конектикат во чиј Устав пишува: „Сета политичка власт му припаѓа на народот и сите слободни влади се засновуваат врз неговата волја и се установени заради негова благосостојба; а народот во секое време има неспорно и неотуѓиво право да ја менува својата форма на владеење на таков начин како што мисли дека е најдобро.“

Со таквото евангелие, граѓанинот кој мисли дека гледа оти политичките облеки на неговата државна заедница се износени, а сепак останува мирен и не се залага за нова облека, е нелојален; тој е предавник. Тоа што тој е можеби единствениот кој мисли дека ја гледа таа изабеност, не го оправдува; негова должност е, сепак, да се залага, а должност на другите е да го нагласаат, ако не ги гледаат работите онака како што ги гледа тој.

И сега, еве, јас сум тука, во земја каде што правото да се зборува како треба да се владее земјата е ограничено на шест личности од секои илјада луѓе. Зашто, ако тие деветстотини и деведесет и четири изразат незадоволство со владејачкиот систем и предложат тој да биде изменет, тие шестмина би затрепериле како еден, тоа би било толку нелојално, толку нечесно, толку гнасно, црно предавство. Така да се рече, јас станав акционер во една корпорација во која деветстотини и деведесет и четири членови ги даваа своите пари и ја вршеа целата работа, а преостанатите шестмина се избрале самите себеси за постојан управен одбор и ги земаат сите дивиденди. Мене ми се чинеше дека она што им е потребно на оние деветстотини и деведесет и четири, тоа е нова уредба...