Блекаут

28 December 2006

Планот + честитка

Ај со арно и со убаво! :-)

Најзгодни блогерки на светот

На Гизмодо е објавена галерија на најзгодни блогерки за 2006 година.

Луѓе бе, џабе ли јас повикував да се ставаат фотографии?! Еее, од тие македонски блогерки што ги знам посредно или непосредно, барем пет може без проблем да влезат во листава.

Моми, ставајте фотки на блоговите, доста со аниме и уметнички слики од кеш.

Фанки цајт мит Бруно (класика!)

24 December 2006

Подигајте ја видливоста на македонски филмови на Ју тјуб

Пред некое време забележав дека на Ју тјуб е тешко или невозможно да се најдат инсерти од македонски филмови, па качив еден трејлер од „Прашина“ што го најдов на веб-сајтот на Милчо Манчевски.

Ги повикувам сите добронамерници што имаат соодветни клипчиња да ги качуваат по вакви сервиси, а исто така и да гласаат за повисок рејтинг на веќе качените. Не заборавајте во таговите да ставите клучни зборови како „Macedonia“.

„Него што“?! (телевизиско папагалство)

На „Канал 5“ има некоја емисија „Пирамида“ за влечење пари од луѓе преку мобилни: тројца избрани кажуваат мислења, а потоа граѓаните им плаќаат на организаторите да гласаат кој бил подобар говорник или кој од кое племе е.

Имаше некаков вовед за насилството во Македонија, со снимки од нападот на дискотеката „Процес“, а спикерот го заврши коментарот со „него што“.

Не би требало со оглед на искуствата, но сеуште ме зачудува и разочарува колку луѓе на кои јазикот (македонскиот јазик! поточно) им е главна алатка во работата не покажуваат ни најмала волја да се грижат за него, ни свест за тоа што зборуваат, додека неуморно папагалски ги копираат не само идеите, туку и изразите на северните соседи. Ова „него што“ е буквален ,превод‘ на српско-хрватско-босанското „него шта“.

Во најширок контекст, македонски превод на тој израз е (толку едноставното) „нели“!

22 December 2006

Предбожиќна атмосфера во Загреб

Снимка од плоштадот на Бан Јелаќиќ во Загреб, направена 22.12.2006 г. Луѓето се подготвуваат за Божиќ и се очекува навала по продавниците.

17 December 2006

Три задачи за сезнајковци

Еден другар од странство ме замоли да му помогнам да најде одговор на следните прашања. Читатели, помагајте!

1. Од кој филм е сценава/ликовите?

2. Од кое растение е семево?


3. Што (по ѓаволите!) е ова суштество?

15 December 2006

Слајд шер = Jу тјуб за презентации

Во право е Дарко што го споредува Слајд шер со Ју тјуб (SlideShare.net). Интерфејсот намерно им е направен ептен сличен. А ептен се слични и по ефективноста: одлични! Еве на пример, вака се вметнува презентација во блог...




...тоа е истата што Дарко ја држеше на конференцијата е-Општество.Мк (пост со видео-клипови поставени на Ју тјуб, исто така пионерски потфат).

13 December 2006

Модул за муабет преку блогот

Ако користите некој сервис за директен муабет (instant messaging: ICQ, MSN, Google Talk, Yahoo!) а особено ако користите повеќе од еден, може да ги интегрирате со Мибо (meebo.com). Дополнително, Мибо овозможува пристап преку веб со прескокнување на фајерволите, а најново нешто што го нудат е вградување на модул на чат во веб-сајт.

Имено, од Мибо ми (meebome.com) добивате код кoj може да го вградите во темплејтот (како што сторив јас) и потоа кога сте логирани посетителите може да ви пишуваат преку него. Прилично е практично, а Гуд бајтс му откри и една маана: прикажува кирилица кога пишува газда(рица)та на блогот, ама посетителите се ограничени на латиница.

08 December 2006

e-Biznis.info Blog » Е-потрчковци на е-потрчковците на е-фраерите

e-Biznis.info Blog » Е-потрчковци на е-потрчковците на е-фраерите:
Ние сакаме да бидеме фраери в град, а како пример ги земаме фраерите в село. Е па, не може тоа така. Од едноставна причина фраерите од село секогаш доцнат со слушање на новата музика, со носење на новата облека и за жал не секогаш први ги имаат [sic] убавите градски девојки.

Најдобар оглас досега што сум го видел

Се скинав од смеење :-)

07 December 2006

Најстариот идол на светот: Обожавање на змија пред 70000 години

Норвешки научници откриле пештера во Боцвана каде што сметаат дека пред 70000 години се одржувале ритуали во чест на питонот. Големо палеонтолошко откритие!
Покрај природна и доправена склуптура во вид на змиска глава, во пештерата има и комора каде што човек може да се скрие и да изгледа дека змијата зборува. Денешните Бушмани (Сан) местото го сметаат за свето, а питонот е еден од најважните ликови во нивната митологија.

Можеби Џим Морисон сепак бил на добра трага.

06 December 2006

Политичка пропаганда преку Ју тјуб

Ова е интересен пример за политичка пропаганда. Некој земал привлечен видео-спот од Сабрина и внатре уфрлил текстуални пораки за поддршка на неговата кауза, инаку малку позната во светот.

Смеата му помогнала да го победи ракот

Другар ми ми го препорача линков (Smijeh mi je pomogao da pobijedim rak), а потоа ми призна дека го дознал од Он.нет:
Во 2005 г. лекарите му откриле рак на Борис Дежуловиќ. Гледал во лицето на лекарот и прво што му паднало на ум бил еден виц. Очајнички се глупирал обидувајќи се да го сокрие стравот. Следувале две операции и хемотерапија. Имал среќа. Преживеал.

05 December 2006

Копачи - силно светнал ден за промоција на МК сајтови во светот

Наглото накачување на посетеноста (и читаноста) на целокупната македонска блогосфера на 4.12.2006 е последица токму на успешна промоција преку Диг.




Извор: Дигимак блог. Она црвеното се однесува на дигуван напис од SF Observer.

По успешниот експеримент, а како дел од подготвителните активности за основање на македонското лоби за социјално вмрежување, ја зголемив својата активност на Диг, заедно со уште неколку пријатели.

Ви препорачувам да се пријавите на сервисот и да ми се јавите преку него, за да може да ве додадам во листата за координирано настапување. Името на овој сервис кој работи на „откопување“ на линкови и нивно вадење на површина може да доведе и до основање на Внатрешна македонска копачка организација, чии членови, надоврзувајќи се на лозарите од 1892 г., би се нарекле копачи. (Ова решение за името произлезе во инспиративен муабет со Дарко Булдиоски од Комуникации.)

Предлог за пригодна химна на организацијата е песната „Копачите“ од Кочо Рацин:

Се к'ти ноќта црна!
Се рути карпа - мрак!
И петли в село пеат
и зората се зори –
над карпа в крв се пие
и темнината пие
силносветналден!
Пробудете се морни
копачки и копачи –
на трудот црн народ!
Со мотика на рамо
за корка сува леб,
по патиштата стрмни,
по полињата paмни,
у вивналиов ден
да тprнeмe и ние
страдалници од век!
На деда Богoмил
земjата poвка, мека,
наба6рена за poд,
со страдна душа чека
ударите ни jаки
со мотиките остри
по троскот пелин трат!
На работа!
На труд!
Да прокопаме меко
полињата родни
афион, тутун, житце
да родат благородни.
И по кривите вади
да пропуштиме води
за оризите млади
и зелени лободи.
На работа!
На труд!
Да роди род богат!
Да бликне живот млад!
На пепел троскот, пелин
во огин пламен jад!
Жилите да пуштат
корења длабоко
плодови да бликнат
високо, високо
слободно на воздух!
Ораме со рало
но земjата ни златна
колку е богата!
На пепел троскот, пелин!
Во огин пламен јaд!
Да престане, да снема
тагата голема
за голиот живот
на човек станал – скот.
И в тaјa мугра пресна
да екне дружна песна
на дружните удари –
та биjат срца млади
и растат силно гради
пребликнати со јaд!
Од сички маки тешки
не видовме бел ден,
а од солзи жешки
не стануе меден
нашиот живот!
На работа!
На труд!
Та не сме саде ние
та не сме саде тука –
ние сме по цел свет
безброjни милиони
на трудот црн – народ!
Да биде честит денот
и првата ни стапка
у првиот ни век!
Ќе мине силен ек
ќе б'сне сонце златно –
по секаде на светот
ќе згине срамно гнетот -
ке л'сне живот нов!
И реки ќе потечат,
и бреме ќе одвлечат
на вековита смрт!
Реките од живи
и пробудени сили
на копачи и копачки
страдни голи гладни
по целата земjа!
Се к'ти ноќта црна!
Се рути карпа - мрак!
И петли в село пеат
и зората се зори –
над карпа в крв се мие
и темнината пие
силно светнал ден!

02 December 2006

Текстови за Толкин на македонски јазик

Апропо каузата, на Агора има неколку текстови за Толкин, човекот, неговото дело и филмовите.

Нема искачање вечер, време за толкиновска индоктринација

Прикажувањето на првиот дел на Господарот на прстените на А1 нуди извонредна прилика за воведување на глобалните културни придобивки во главните македонски општествени текови (мејнстриминг). Во најмала рака, увид во најновите инкарнации на романтизмот, што е сепак дел од општа култура.

Прикажувањето во дневната соба, на една од главните телевизии, со превод на македонски им овозможува на љубителите на Толкин да им ја објаснат убавината на сагата на своите роднини и пријатели, кои со години се чудат што мајка бараат нивните блиски киснејќи затворени во своите одајчиња по компјутерите, конзумирајќи пиратски снимки, игри, дивидија и слични производи на темата.

Или, како што би рекле Фродо и Гандалф пред да дојдат до мостот Кхазад дум, во пештерите на Морија:
Фродо: Посакувам прстенот никогаш да не дојдеше до мене. Посакувам ништо од ова да не се случеше.

Гандалф: Истото го посакуваат сите што живеат во зловреме, но одлуката за тоа какви се времињата не зависи од нив. Она што зависи од нас е што ќе правиме со времето кое ни е дадено. Има други сили кои работат во овој свет, Фродо, покрај волјата на злото. На Билбо му беше судено да го најде прстенот. Во тој случај, истото важи и за тебе. А тоа е охрабрувачка мисла. Ех, така некако.
Извор: транскрипт на сценариото. Има верзии со и без слики, за пофалба од аспект на употребливост.

САД го легализира абандонверот

Одделот за авторски права на Владата на САД објавил нова регулатива со која се дозволува „користењето и дистрибуцијата на абендонвер“ (abandonware), односно софтвер што повеќе не се дистрибуира од страна на оригиналните издавачи.

Ова е одличен знак оти конечно се декриминализирани љубителите на старовремските игри од Абандонија, како што се Дјун, Центурио и Елит. :-)

01 December 2006

Предозирање со филмови за филмови

Вчера вечер имав прилика да гледам два целовечерни документарни филма чија тема е филмот како медиум:
Начелно, обата ми направија кеиф, а коинцидентно имаат и слична структура и тема - објаснување на функционирањето на филмот како медиум на симболичко и психолошко ниво, со примери од сцени од познати филмови. Арно ама, со значајни разлики:
  • „Едукаторот“ ги изложува методите на раскажување и начинот на размислување карактеристични за „западната цивилизација“, поточно оној дел на светот под влијание на римското царство и христијанството. Ова може да се прошири и на другите две сродни религии - јудаизмот и исламот, но ми се допадна што заклучоците не се наметнуваат на универзално ниво.
  • Жижек за основа на своите анализи ја зема психоанализата, гранка на психологијата која е прилично дискредитирана во последните шеесетина години (оти не почива на строго почитување на стандардите на научниот метод), па претежно ја користат слободните мислители како филозофите и аналитичарите на книжевноста. Не ми се допадна што објасненијата беа прилично генерализирани.
Дополнителен контраст даде и тоа што во првиот филм нема класичен наратор, туку текстот го чита компјутерска програма, додека во вториот личноста на нараторот е сеприсутна и му дава особен шарм. Иако се прилично долги, првиот 1:40, а вториот 2 часа, нивното гледање не го сметам за губење време, туку за многу корисна и забавна активност.

30 November 2006

20 основни е-услуги на ЕУ

20 основни е-услуги на ЕУ се состојат од 12 услуги наменети за граѓаните и 8 услуги наменети за деловните субјекти кои први треба да ги обезбедат владите на земјите членки и земјите кандидати.

Услугите наменети за граѓаните (G2C) се:

  • данок на личен доход
  • барање работа
  • плаќање социјално осигурување
  • лични документи за идентификација
  • регистрација на приватни моторни возила
  • барање за градба
  • известување на полицијата
  • јавни библиотек
  • лични документи
  • запишување во средно училиште или универзитет
  • промена на постојана адреса
  • медицински услуги

Услугите наменети за деловните субјекти (G2B) се:

  • социјално осигурување за вработените
  • известување и пријавување на даноци за претпријатија
  • данок на додадена вредност (ДДВ)
  • регистрирање на ново претпријатие
  • поднесување податоци до државните органи
  • царинска декларација
  • дозволи за загадување на животната околина
  • јавни набавки
(Ја имав ставено статијава како никулец на македонската Википедија, ама е предложена за бришење без образложение, па си реков, да ја зачувам како бекап и овде.)

„Филмски водич за перверзни“ - проекција вечер во Точка

Ме поканија на проекцијата на филмот “Филмски водич за перверзни”, што ќе се одржи во Културниот центар Точка, во четврток (30.11) со почеток во 20 часот. Наратор и водич во филмот е Славој Жижек, а режијата е на Софи Фајнс.
„Филмот е врвна уметност. Тој не ти го дава она по што копнееш - тој ти кажува како да копнееш.“ - Славој Жижек
Мислам дека е фер и поштено да ја споделам информацијата и со пошироката јавност. Со кликнување на сликата се добива поинформативна верзија.

29 November 2006

Шега за галичкиот дијалект

Радосната вест за отворањето на блогот Галичник ме потсети на една анегдота на која бев сведок во пред едно 15 години. Разговараат зајадени галичанец и прилепчанец:
П: Дали знаеш како е галичката азбука?
Г: ?
П: О, б, в, г, д, ѓ....
(Ова дека во галичкиот или мијачкиот дијалект на многу места една форма на „о“ стои место „а“, на пример за „рака“ се вели „рока“.)

Нов блог за Галичник и пословечкиот говор

ГаличанкаМногу ме израдува отворањето на блогот Галичник, чија цел е зачувување на пословечкиот говор:
Овој жаргон, според нашите први сознанија, го користеле Галичаните откога се отселиле по градовите низ Македонија, како таен, шифриран јазик, за побрзо и/или полесно да ја избркаат работата, притоа користејќи се со познанствата (и кредитите!) од стариот им крај.

Според некои, говорот го развиле гурбетчиите, кога при враќањето дома донесувале новини во говорот што ги разменувале и надополнувале.
Јас не сум галичанец, ама многу ми е мило и местото и многу луѓе што потекнуваат од него. На времето направив и една репортажа од Галичка свадба (на англиски), од која потекнува и фотографијата од десно.

Поддршка за Вуна во промоцијата на Опен офис

Браво за Вуна што го промовира Опен офис. Тој вели и дека тоа што е на македонски „може за некого и да е проблем, рака на срце“. Се согласувам дека за оние кои се навикнати на англиски интерфејс, веројатно не им е толку удобно наназад да преведуваат разни технички опции и имиња на менија и копчиња.

Арно ама, истражувањето од 2004 ги има дадено следните резултати:
Во која мера го познавате англискиот јазик? Само 23,8% се со активно познавање на англискиот јазик (разбираат, читаат и пишуваат).
..додека на прашањето „дали недоволното познавање на англискиот јазик го чувст-вувате како хендикеп (недостаток) во користењето на компјутерите?“:
Дури 2/3 (68,6%) од сите анкетирани одговорија потврдно, а само 22,3% негативно (9,1% не знаат). Притоа, не може да се издвои ниту една категорија според социо-демографските карактеристики на која тоа не ѝ пречи. Оттука, не изненадува што голем процент од граѓаните сметаат дека компјутерските програми (софтвер) треба да бидат достапни и на македонски јазик. Овој став го делат 59,5% од анкетираните, 25,8% сметаат дека е добро компјутерските програми да бидат достапни и на македонски јазик, иако незадолжи-телно, а само за 7,2% тоа не е потребно (7,5% не знаат).
Токму затоа, како што пишав во коментарот на постот на Вуна, покрај активностите за локализација:
Метаморфозис има подготвено упатство за Опен офис на македонски јазик во форма на печатена книга и е-книга. Во електронска форма може да се добие бесплатно (лиценцирано е под Криејтив комонс 2.0) и е ставено на ЦД-то „Заврши си работа“, а во печатена форма по поволна цена на ниво на трошоци за изработка (тел. 02/3109 325) - и поефтино од фотокопирање.

Стамбл апон: изненадувачки ефективен при промоција на блог

Како што веќе известив, за викендот отворив нов блог посветен на научната фантастика (на англиски) за да го тестирам Блогер ин бета (и затоа што се интересирам за областа, секако).

Според неговиот Сајт митер, вчера блогот имаше над илјада посети. За промоција на блогот ги користев следните техники:
  • известување преку Стамбл апон - кое се покажа исклучително ефективно: повеќето од реферерите беа/се од овој сервис
  • известување преку Диг - мал процент од посетите се со реферери од овде, но сепак сметам дека има голем потенцијал
  • известување на администраторите на Маседониа срч и Дигимак за отворањето на блогот - ефект неопределен
  • ставање на линкот во блогролот на обете верзии на Развигор и на СНД - минимален ефект.
Мислам дека голем удел во успехот има јазикот на блогот, оти благодарение на него повеќе луѓе можат да ја прочитаат содржината, да им се свиди, па да го препорачаат.

И покрај тоа, мислам дека има голем потенцијал ако се зберат македонските корисници и на Стамбл апон и на Диг и се организираат и координираат за заеднички промотивни активности, некој вид македонско лоби за социјален нетворкинг. Влијанието потоа би се ширело на нивните странски пријатели или истомисленици и пошироко. Пишете коментар на постов или мејл ако сте заинтересирани за учество во таква иницијатива.

28 November 2006

Тестирање на Блогер ин бета со отворање нов блог - SF Observer

За да ја тестирам новата верзија на Блогер (Blogger in Beta) отворив нов блог посветен на научната фантастика, на англиски јазик (Science Fiction Observer). Новиот систем нуди неколку предности, а ги задржува сите особини на стариот:
  • елементите на дизајнот на блогот може модуларно да се вадат и ставаат по список, со нивно вклопување во избран темплејт
  • има можност за категоризирање на постовите преку тагови, ткн. лејбели
  • корисничкиот интерфејс е редизајниран да биде по „јузер-френдли“ и да изгледа „поубаво“
  • сепак може да се чепка во кодот и тој да се прилагодува рачно
Вкупниот впечаток ми е исклучително поволен. Кога ќе има можност, веднаш ќе ги префрлам постоечките блогови од стариот на новиот Блогер. Има задршка за блогови со голем обем и во други случаи.

PS
Помогнете во промоцијата на блогот за научна фантастика и сродни работи со тоа што ќе ставите линкови до него(вите постови), од вашите блогови или ако сте член/ка на Стамбл апон или Диг (за Хајлендер и Амбер, Матрикс и Дина, Меланхоличните слонови и авторските права).

27 November 2006

Википедија на англиски достигнала милион и пол написи

На 24 ноември на Википедија осамна известување дека англиската верзија има 1.500.000 написи, „точно два месеци откако постигнале 1.400.000“.

Се согласувам со Томислав Медак и Марсел Марс од Мултимедијалниот институт од Загреб кои на работилницата за интелектуална сопственост на конференцијата е-Општество.Мк изјавија дека појавата на Википедија ќе зазема високо место во историјата на науката и знаењето воопшто, рамно на она што го држат разни генијални умови.

Kолку е тоа милион и пол написи? Па, ако ви требаат само пет минути да прочитате еден напис, ќе ви требаат скоро петнаесет години непрестајно читање за да ги испрочитате сите.

24 November 2006

Препораките и заклучоците од е-Општество.Мк објавени на веб

На веб-сајтот од конференцијата е-Општество.Мк се достапни заклучоците и препораките направени врз основа на излагањата и дискусиите од сите пленарни сесии.

Покрај преводот на сите јазици, наскоро ќе следи и објавување на дел од видео-материјалот на веб.

Демант за „Форум плус“: не е Влага, туку Улага во Вратница

Во најновиот број на „Форум плус“ (бр. 60 од Александар Писарев има објавено прекрасен напис за с. Вратница. Меѓу другите, во написот се зборува и за мојот роден тетин Драго, чие крстено име е Карло Улага. Во тој дел се направени неколку ненамерни грешки, на кои ќе укажам директно преку поправки во цитатот:
Влеговме во дворот и во куќата на Словенецот Карл Влага Улага од Марибор. Го прашав: „Од каде вие во Вратница?“, а тој ми рече: „Во раните шеесетти години во Македонија немаше хемичари и јас дојдов во Југохром како стручњак, млад хемичар. Тука се оженив со Трпана од Вратница Јегуновце, се вљубив и во неа и во селото, па решив тука да останам да живеам. Јас сум восхитен од овој крај и од убавината на ова село. Сега сум во пензија и уживам собирајќи печурки“.
На сликата (од лево кон десно): тетин Драго и Стојче Крстевски.

PS
Презимето е истото како на скијачот Примож Улага - но не се блиски роднини.

23 November 2006

Идеална локација за поетско читање на Букарски

Се работи за дуќанот „Буковски“ во скопски „Рамстор“. Местото е исполнето со асоцијации за кои верните читатели на Алекс Букарски ќе најдат допирни точки-чакри со неговото досегашно творештво.

Од алузијата на презимето на омилениот писател, преку контрастот со мачоизмот и вешто употребената самоиронија, до близината на козметичките продавници и нивните конзумерски расположени муштерики - потенцијални припаднички на ордата обожавателки.

22 November 2006

Препорака: трикот со картите и аквариумот

Трикот со карти што го препорачува Гудбајтс е навистина одличен.

Препорака: Детективска приказна од ВББ

ВББ има направено истрага во врска со девојка од фотографија што се појавила на интернет, за која наводно му тврделе дека се работи за „Бисера од Скопје“. Процесот и резултатите се многу поучни. Дигресија: тие Бисери од Скопје што лично ги познавам се дури и поубави од дотичната.

Што да правите ако по е-пошта ви стигне winmail.dat

ТандербрдАко како мене користите Тандербрд и ви се случи како атачмент да добиете еден чуден фајл winmail.dat, за кој Виндоуз ви препорачува да пробате да го отворите со Корел дроу, имајте го на ум следното:
Кога корисникот на Аутлук (Outlook) составува и праќа порака со користење на форматите Рич текст или ХТМЛ, Аутлук автоматски генерира датотека со име winmail.dat и ја закачува на крајот од пораката. Оваа датотека содржи информации за форматирањето во формат кој не може да се чита од луѓе, кои Аутлук ги користи при примање на таква порака за соодветно да ја прикаже пораката. За жал, Аутлук е единствениот клиент за е-пошта што може да ги користи овие информации.
Решение: искористете ја програмата WMDecode, која може да ја симнете од www.biblet.com.

Овчарски кучиња од Евроазија, обединете се

Пред некој ден, едно ерменско кученце го споредив со шарпланинче. Во коментар на видеото на Ју тјуб, извесен Ерменец ми пишал дека името на видот е „чобани шун“.

Зборот чобан и кај нас (и во македонскиот и во албанскиот) се употребува за овчар, понекогаш.

Дополнение: проверив со други Ерменци, ваистина „чобан“ на ерменски е овчар, а „шун“ е куче. Ваквите кучиња ги сметаат за многу силни, способни да се справат и со волци.

21 November 2006

Објавен Индексот на граѓанско општество, прво во е-форма

Пред малку ми стигна известување дека МЦМС го објавил Индексот на граѓанското опстество во Република Македонија (ИГО):
„По 15 години транзиција-од стабилизација кон граѓанско учество” е насловот на македонскиот извештај што можете да го најдете на www.mcms.org.mk; www.gragjanskisvet.org.mk, на македонски јазик и на www.civicworld.org.mk и www.civicus.org/new/CSI_country_reports.asp на англиски јазик.

Граѓанското опстество во Македонија во моментов се приближува кон крајот на својот период на стабилизација. Изградено околу силни вредности, граѓанското општество, дури и ако се базира на ограничена граѓанска поддршка, е вкоренето во некои опстештвени групи (жени, лица со посебни потреби, млади), и игра важна улога. Граѓанското општество треба да се гради на овој успех и да се обидува да го прошири граѓанското учество во своите иницијативи. Овде, граѓанското опстество ќе мора да одговори на два клучни социјални проблеми – борбата со сиромаштијата (невработеноста) и корупцијата.

е-Општество.Мк: Лаптопите на Метаморфозис се со дуал бут ;-)

Заедно со добриот впечаток, Игор Стаматовски има една замерка во врска со конференцијата е-Општество.Мк:
Денот 1 од конференцијата ми беше навистина интересен и возбудлив. Организацијата беше добро изведена до страна на Метаморфозис, со исклучок на тоа дека лаптопите беа со инсталиран Windows, а организацијата тврди дека се промотори на слободен софтвер. Тоa им беше кикс.
Метаморфозис го промовира слободниот софтвер, поттикнувајќи и негова локализација, дистрибуција, јакнење на јавната свест, како и ширење практични знаења за него. Но не гледам зошто тоа мора да биде поврзано со исклучивост. Според мене, развојот на информатичко општество не се базира на догматски пристап, туку на флексибилност и примена на решенија кои најмногу одговараат во дадениот момент.

На пример, да го објавевме ЦД-то со слободен софтвер „Заврши си работа“ во верзија за Линукс, мислам дека немаше да има таков успех кај широката публика која претежно користи Виндоуз. Вака овозможивме ширење на слободен софтвер кај неколку илјади нови корисници, кои исто така станаа активни учесници во движењето, вложувајќи сопствени ресурси преку плаќање на симболичната цена.

Инаку, лаптопите на Метаморфозис кои се користеа за презентациите се со дуал бут - лиценциран Виндоуз и Убунту Линукс.

PS
На веб-сајтот од конференцијата е-Општество.Мк континуирано се дополнуваат фотогалериите, а веќе е ставена онаа од сесијата во која учествуваше Игор како претставник на Слободен софтвер Македонија, овозможувајќи афирмација и промоција на самата организација.

Препорака: Анкетата на Моби за Ирак и Авганистан

Мислам дека прашањето кое Моби го поставува во најновата анкета:
е исклучително важно и ги поттикнувам сите да земат учество во неговото јавно разрешување. Јас веќе го дадов својот глас за една од понудените опции.

20 November 2006

Конечно - категории на Блогер

Новата верзија на Блогер, Блогер ин бета, нуди и динамичка категоризација преку тагови, кои тука се нарекуваат лејбели. :-)

Ерменско шарпланинче = араратинче?

При посета на езерото Севан во Ерменија ме сретна ова мало кученце кое личи на шарпланинче. Ама бидејќи Аратат е главната ерменска планина, можеби таму ги викаат араратинци. Не прашав, до душа.

Кога светлата ќе згаснат...

Дали знаете дека ако ставите светилка (сијалица) во устата, потоа нема да може да ја извадите без да ја скршите?




Игор Кобилеански, култниот молдавски режисер, до неодамна студент на универзитетот во Букурешт, има направено филм (cind se stinge lumina / when the lights go out) на темата кој е објавен на Ју тјуб. Одличен метод на културна промоција!

19 November 2006

Изложба на фотографии на Бојана во клубот „Лудница“

Вечерва во 21 часот во кафеаната клубот „Лудница“ ќе биде отворена изложба на фотографии од патувањата по Африка на Бојана Димитрова, дизајнерка и диџејка позната во скопските елитни кругови. Каталогот што имав прилика да го ѕирнам ветува одлични визуелни доживувања.

17 November 2006

Звукброда во Точка

Ми се направи многу кеиф на концертот на Звукброда во Точка, оти наспроти тоа што влегов прилично уморен музиката суптилно ме „подигна“ и развесели. Концертот беше надоврзан на конференцијата е-Општество, еден вид практичен пример на темата нов пристап кон авторските права во дигиталната ера.

Песни на оваа група од Загреб може да се симнат од нивниот веб-сајт, во mp3-формат и лиценцирани под Криејтив комонс со лиценцата GNU GPL (copyleft).

16 November 2006

Голем интерес за конференцијата е-Општество.Мк

Искуството од првите два дена на меѓународната конференција е-Општество.Мк е дека има огромен интерес за темите од информатичкото општество што ги покрива. Беше поставен систем за регистрирање преку интернет и повеќето од пријавите во Метаморфозис ги добивме на тој начин. На конференцијата се пријавија над 350 учесници, од кои 250 во рокот.

Оние што се пријавија по истекот на рокот не беа одбиени, туку исто така можеа да земат учество во пленарните сесии, но не и во работилниците кои се одржуваат во помали групи во текот на утрешниот ден. Овие два дена на секоја од сесиите учествуваа буквално стотици луѓе и добив доста коментари дека благодарение на настанот можеле да научат многу нови работи или да воспостават контакти.

11 November 2006

Падот на комунизмот и Алан Форд во него

Вчера во Бугарија некои ја прославуваа годишнината од падот на комунизмот (10.11.1989). Луѓето си имаат и точен датум, оти кратко време по паѓањето на Берлинскиот ѕид, бил официјално симнат од власт Тодор Живков...

Коинцидентно, во трафика наидов на ново издание на десеттата епизода на Алан Форд - „Формули“ на српски (Magnus & Bunker, „Formule“, Alan Ford Special, br. 17, ISSN 1820-5178, оригинално објавена во јануари 1970 година) за која во поговорот пишува дека иако требало да се појави и кај нас (на хрватски) некаде на почетокот на седумдесеттите:
...заради скокотливата тема во која авторската двојка се зафркава со тогашниот СССР, владеењето на пролетеријатот и работничката класа, но и поради ликовното решение на главниот руски шпијун - Бруски (за кого тогашните издавачи утврдиле дека со ликот потсетува на Јосип Броз) оваа епизода на нашите простори се нема појавено сè до мај 1990 година. Тогаш, после падот на разноразни стеги и цензури, конечно се појавува во тробројот на „Вјесник“.

Во онаа бивша Југославија нејзиниот комунистички режим ни стрипот го немаше поштедено од цензура, па и тој како и книжевните и ликовните дела, филмските остварувања и уште многу други нешта, минуваше низ рацете на ткн. „цензорски комитети“ кои му ја кроеја судбината. Секако, цензурата не го заобиколи ни стрипот Алан Форд во кој беа преправани одделни кадри, се вршеле интервенции на цртежот, корекции во текстот, а дури се применувал и наједноставниот метод - исфрлање на цели страници или слики! Баш таква судбина ја снајде и оваа епизода...

Иронично е што овој стрип на Запад доживеал бојкоти поради исмејувањето на капиталистичкиот систем (особено власта и богатите) доживеал да го забранат и на Истокот, штом отровната стрела на Магнус и Бункер се насочила кон неприкосновените бољшевичко-пролетерски односи.
Не сум изненаден, оти цензурата не зависи од тоа дали системот е „лев“ или „десен“, туку дали општеството е отворено или склоно кон тоталитарност.

09 November 2006

Киргистан се подотвори

Претседателот Бакиев го потпишал новиот Устав, а коинцидентно проработе и пристапот до веб-сајтовите од Киргистан што не беа достапни во текот на политичката криза. Првите два линка се до некои од таквите, наведени во претходниот пост на темава.

Македонските блогови во „Соѕвездија“ на ТВ Телма

Вечерва од 21 часот во емисијата „Соѕвездија“ на ТВ Телма беше прикажан и прилог за поврзаноста на македонските блогови и културата.

Фото: Развигор

Во емисијата зборувме јас и Дарко Булдиоски (на сликата), а на екран беа прикажани и веб-сајтови, како Маседониа срч и Дигимак, а особено блогови, како Археолошки дневник, ВББ, .аНТИ, Вуна, Букарски, М-соулз и неколку други...

Скрин-шотови: Волан

Репризи - ноќеска во 1:30 и утре во 10:30 часот.

Протестот против визниот режим

Волан има објавено извештај и фотографии од добриот протест против злиот визен режим.

Фото: Волан

Останувам на ставот: да ја извадиме гредата од нашето око, пред да бараме другите да ги извадат раските.

07 November 2006

Анкета: на кој јазик читате списанија за информатика?

На веб-сајтот на Метаморфозис е поставена нова анкета, со прашање:
  • На кој јазик најчесто следите печатени компјутерски списанија?

Блокирање на интернет и во Киргистан

На Комуникации има пост за Тринаесетте земји непријатели на интернетот, според Репортери без граници. На списокот не е Киргистан, но веројатно ќе влезе во наредната итерација. Како што веќе извести Веб-сајт на денот во написот за нивниот претседателски веб-сајт:
За жал, ниту сајтовите за вести на руски или на англиски, како ни оние на повидните невладини организации не се достапни за посетители од странство од почетокот на антивладините демонстрации минатата недела.

Катедралата во Ечмиаѕен + Гугл видео наспроти Ју тјуб

При посетата на катедралата во Ечмиаѕен, седиштето на поглаварот на Eрменската Апостолска Црква направив кратко видео-клипче со ентериерот на црквата. Според Ерменците, нивните цркви не се многу накитени заради нагласување на духовното над материјалното, па и главната катедрала не е исклучок. Ерменското кралство прво во светот го прифатила христијанството како државна религија во 301 г., десет години пред Рим/Византија.



Клипчето е во форматот за мобилни 3gp, и не беше проблем да се качи и на Гугл видео и на Ју тјуб. Обата сервиси прават автоматска конверзија, со следните разлики:
  • На Гугл видео клипот е достапен јавно веднаш, на Ју тјуб се чека подолго време.
  • Од оригиналната големина 176х144 пиксели едниот го шири на 400х326, а другиот на 425х350.
  • Кај Ју тјуб е полесно да се види пермалинкот, а и кодот за вметнување е подостапен, нема потреба од дополнително кликање.
  • Гугл видео има копче за автоматско вметнување на видеото во блог, кое бара да внесување логин и лозинка за блог-сервисот, а потоа не прави ништо.

06 November 2006

Ерменско гостопримство

Ерменците се многу гостопримливи луѓе. Ова не го тропам само онака, туку затоа што во тек на неколку дена престој во Ереван можам да наведам барем три јасни типови случаи, што е прилично голема инцидентност.

Thank you Artak, Mery, Ani and Hakob!

1. Пристигнувам на аеродром во 3 и кусур сабајле, троа уморен. Поради недоразбирање, не ме чека превоз, а поради Т-мобајл, немам роуминг (!!!) и не можам да стапам во контакт со домаќините. Навалентни таксисти како секаде во источна Европа ми нудат 20 евра за превоз до хотелот. Арно ама, младиве работници од компанијата за мобилни „ВИВА сел“ (не е партнерот на Т-мобајл) се обидоа да ми го проработат телефонот, и кога не успејаа, се јавија кај што требаше, ми средија да дојде такси од компанијата што нив ги вози на/од работа и да ми наплати 4 пати помалку, а и го пратија овој батката од обезбедувањето да ми прави друштво до таксито.


2. Се шетам по чаршија (добро де, немаат класична чаршија, оти градот кој е стар 2700 години бил стопати разурнуван и реизградуван, особено во советските дваесетти) и гледам едно дуќанче за сувенири кај што имам купено маички при претходната посета. Си викам ај да ѕирнам како е. Дуќанот се состои од две стари сопчиња, во првата има килими, во втората џиџи-миџи. Си влегувам јас, кога внатре седнати неколку домаќини, мезат печено сецкано мевце со зеленчук. „Еее добре дојде, земи од ова, повели вотка од праска, оригинална од село (од пластична туба)“ - „Не не фала“ - „Земи земи, ај еве ти чаша. Од кај си, како си, ти се допаѓа месцево?“ И така, пијалокот беше перфектен и ептен загреваше, ама мислам многу повеќе загреваше човечката топлина.

Келнерката од ресторанот Долмама3. За по кафeани, накратко: во случајот кога не нарачав алкохол со ручекот, ме почестија „од куќата“ со вино од кајсија (исто перфектно вкусно). Другиот ден за вечера, на една оближна маса се славеше роденден, на кој, како одговор на куртоазна честитка, набрзо бевме поканети да се вклучиме со сите придобивки од танц до торта. Другата вечер во трета кафана, нарачуваме кој што сака, и ни носат два бокали вино - суво и слатко. Да дегустираме... без никаква дополнителна наплата.

Вечерва повторно се отвора „Точка“

  • Вечер (6.11.2006) во 20 часот ќе започне отворањето на новата локација на Културниот центар „Точка“.
  • Најавен е настап на Фолтин, Драгана Костадиновска и Трајанка Илиевска - Таци.
  • Новата адреса е бул. Климент Охридски 15 - позади Соборниот храм и Светиот синод.

05 November 2006

Махир сака да го тужи Борат

Без разлика што го почитувам ликот и делото на Борат, како и правото на слобода на говор на Саша Барон Коен да тропа глупости за Казахстан (па и за Македонија - ако смени мета), останувам на ставот кој пред година дена го изнесов во рецензијата на неговиот веб-сајт. Имено тогаш реков дека ликот на Борат се темели на две нешта:
Првото е директно копирање на искрениот маалски стил на Турчинот Махир Чагри кој стана светски познат благодарение на смешноста на неговиот недоучен англиски јазик, при неговотo барање пријатели низ светот преку интернет.

Второто е тоа што главниот тек на хипер-политички коректната јавност во САД и ЕУ дозволува еден исклучок при спроведувањето на непишаната забрана за стереотипизирање врз база на културниот идентитет: во случајот на луѓе од бившиот комунистички блок.
Арно ама, додека бившите комунисти, скоевци и пионери си ќутат, Махир страјкс бек. Во интервјуто за Вајерд (Mahir to Borat: I Sue You!), го повторува мојот горенаведен став и вели дека ќе го тужи Коен.

Јас да сум уредник на македонски весник, би пратил новинар да направи интервју со две личности:
  • Махир, разбира се. Сигурно одговара на е-пошта преку неговиот веб-сајт.
  • Есма и Кочани оркестра, за тоа што мислат за филмот со кој се афирмираат нивни песни и дали добиле пари за тоа.
  • Кај две, таму и три - истражувачка сторија за каде е сега Васка, девојката што изворно ја пееше „Едерлези“ во „Дом за бесење“ и која учеше во моето о.у. „Васил Главинов“ од Топанско Поле.

Чисто процедурално: игри, а не игрици (пак)

Во постот на .аНТИ за обидот за цензурата на една игра ми боцна око тоа што го користи терминот „игрица“ наместо „игра“ - а треба обратно. Истакнувам процедурална забелешка. ;-)

И Македонија е дел од чуварите на визното гето

Кај Рибарот забележав преглед на дискусии за некои протести околу визниот режим. Со оглед на тоа што бев во странство додека траеле, некако ми се далечни ;-), па ќе се вклучам со неколку прашања:
  • Дали нашата држава сака да ни доаѓаат гости од странство или не?
Ако сака, тогаш зошто е екстремно тешко за поголемиот дел жители на светот да добијат виза за Македонија? Според правилата за визен режим од сајтот на МНР, тие мора да ја извадат во некоја од малубројните амбасади.
  • Зошто да не може странците да добиваат (и плаќаат визи) на граница?
Колку што ми е познато, жителите на ЕУ ја имаат оваа привилегија, но на официјалниот веб-сајт не го пишува тоа, па не може да бидам сигурен. Зошто да мора човек што сака да стигне во Македонија да троши денови плус во некоја дополнителна странска земја заради чиста бирократска формалност? Особено што не е наведено што треба да прават граѓаните на земјите кои не се наведени во списокот.

Забележав и барем една нелогичност. За давање визи за Молдавија, надлежна е амбасадата во Бугарија, а не онаа во многу поблиската и за Молдавците подостапна Романија. Особено поради тоа што со влегувањето во ЕУ, Романија ќе им овозможи бесплатни визи, додека за Бугарија, немам чуено.

Опасност за приватноста со Фајерфокс

Доколку новиот Фајерфокс не го затворите преку копче во неговиот прозорец, туку автоматски со гаснење на компјутерот, наредниот пат кога ќе го пуштите ви се појавува прашање дали сакате да ја продолжите претходната сесија (Restore Previous Session).

Арно ама, ако речете да, тогаш ги продолжува и сесиите на веб-мејл и сличните сервиси од кои не сте биле одлогирани во моментот на гасење. Со ова се отвора можност ако истиот компјутер го користи друга личност, да има пристап до вашите приватни работи.

За жал, во подесувањата на Фајерфокс не најдов како може да се исклучи оваа опција.

29 October 2006

Ѕирнување во современото ерменско сликарство


Шетајќи се по Ереван, наидов на галеријата „Араме“, сместена во ниско приземје во близина на главниот плоштад. Луѓево не само што се трудат да презентираат квалитетни слики од современи автори, туку велат и дека доста продаваат во странство благодарение на интернет, а и со учество на меѓународни настани како Артекспо во Њујорк. И... нудат достава било каде во светот. Е зошто нашиве галеристи не прават така?


Сликите се „Револуција“ и „Натпревар“ од Армен Геворгијан...

...и „Надеж“ од Давор Моурдијан.

28 October 2006

Ерменија на прв поглед (по втор пат)

Ерменија веќе ја имам посетено во 2004 година и од тогаш до сега барем надворешно има елементи на напредок. Аеродромот тогаш беше во типичен „советски“ стил и со хаотичен прием на гостите - немаше ред, за да поминеш требаше да се буткаш, инаку ако си чекаш, ќе чекаш. Полицијата со огромни шапки воопшто не интервенираше.

Сега е заменет со нов терминал, со перфектен изглед, голем, мермерен, со сите матракуки како оние јажињана за застанување во ред, многу шалтери за вадење виза (на лице место - 30$) и со убави фотографии на кампања за ребрендирање на земјата, како и млад и симпатичен персонал кој следи што се случува и прашува да не треба нешто. Овој терминал бил само за влез, а градат и други, со цел да прераснат во транзитна точка до околните и далечни дестинации, наместо „слепо црево“.

Низ центарот на Ереван има многу повеќе продавници за облеки од дизајнерски конфекции, меѓу кои и од „Тера нова“. Иако повеќето мажи сеуште се облекуваат во црно, или во костуми или во подолги јакни, народот не изгледа тмурно дури и на облачново ноемвриско време.

Плоштадот на Републиката е огромен и опкружен со репрезентативни зданија.

Веројатно затоа што е сабота, низ центарот на Ереван во текот на пладнето ечеше од сирени на автомобили. Свадби. Изгледа имаат обичај да свртат по неколку кругчиња на главниот плоштад, како овие на фотографијава. Младенците се во белата лимузина, а во таа што вози пред нив низ отворениот покрив е проврен камерман кој ги снима...

Препорачана авиокомпанија: Чешки аеротранспорт (Czech Airlines Rules!)

По што се разликува Чешкиот аеротранспорт (České aerolinie | Czech Airlines) од
  • МАТ и Ал Италија? - Не наплаќаат за храна во авионот.
  • ЈАТ? - Екипажот е многу пољубезен и списанието е скоро целосно неоптеретено од политика.
  • Сите горенаведени? - Чехињиве служат алкохол (чешко вино и пиво) во авионот без дополнителна наплата, а храната на долги летови е топол оброк + вкусна.

27 October 2006

Чесите скромно се фалат дека им оди добро

Според весникот „Праг пост“ (The Prague Post) што го прочитав во авион, на Чесиве добро им оди, ама се гледа дека не се навикнати да се фалат баш, па и кога изложуваат нешто пофално, во истата или соседната вест ставаат и информации за некои потешкотии. А и во вести за лоши работи ставаат по некој поволен аспект.

На пример, Чешка наводно има невиден економски подем во последниве 15 години, што довело и до имаат огромен пораст на корисници на широкопојасен интернет-пристап (300 илјади нови годинава, 1 милион вкупно од 10 милиони жители), доволно за Скајп да се локализира за чешки и да отвори подружница. Арно ама Ромите сеуште не ги почуствувале придобивките, оти локалните власти ги пренасочуваат парите од централната власт наменети за нивна дегетоизација.

Како дел од процесот на ослободување од комунистичкото наследство, ги прибираат сеќавањата на бившите комунистички раководители од периодот кој го нарекуваат „нормализација“, односно - враќање од комунизам кон нормалност.

Офлајн имаше и напис за тоа како Чехињите биле многу убави, паметни и еманципирани, како тековната Мис на светот, ама види беља - откако се придружиле на ЕУ, најубавите одат да работат како манекенки позападно.

А со ЕУ имаат и друг проблем - покасно ќе влезат во Шенген, па испаднало дека предвреме пренасочиле 500 гранични полицајци за кои мислеле дека нема да им требаат. Сепак, од тоа немало последици врз криминалот, па дури забележуваат намалена трговија со луѓе. Полицајците развиле и софтвер за идентификација преку òдот, ама засега никој не сака да го употребува.

И најпосле, во Прага има Фестивал на стрипот (Komiks Fest). Ама чешкиот стрип не се извезува.

На пат за Ереван, поздрав од Прага

Патувам за Ерменија на Конференција за улогата на слободниот софтвер во развојот на информатичкото општество. Таму ќе го презентирам истражувањето на Метаморфозис за софтверот во општините.

Моментално сум на аеродромот во Прага, во една кафеана што истовремено служи како интернет-кафе. Услов за седнување на компјутер е да купиш пијалак. П'лзењско пиво = 4 евра.

Аеродромов сигурно не е еден од најефтините што сум ги видел, но за аеродром на западна земја е сигурно најрелаксиран. Нема цело време предупредувања од типот „не го оставајте багажот сам“ и слични пораки за дигање параноја, како по американските, швајцарските или италијанските аеродроми што сум ги посетил во последниве неколку години. Има и канти за ѓубре. Значи, не се плашат нешто од оставени бомби, а не прават ни проблем со неколку кила течности во рачен багаж. Луѓето се љубезни, а единствените пораки преку разглас се до оние кои доцнат на своите летови, па ги молат да се качат инаку ќе отидат без нив.

Виндоузот на машинава е на германски, но може да се додаде азбука на тастатура, па еве пишувам директно на „Mazedonisch (FYROM)“. И интерфејсот на Блогер е на германски.

Забрана за користење мобилни во училиште

Случајно се најдов во едно скопско училиште и не одолеав на дискретниот шарм на забранава за користење мобилни телефони во него.

Внимание ми привлече поуката: „Не заборавајте дека доколку поседувате мобилен телефон сте потенцијална жртва на крадците. Затоа чувајте го на безбедно место!“

25 October 2006

Тривијализација како средство за привлекување публика?

На блогот Трибун има обид за анализа на македонската блогерска заедница, особено на факторите кои влијаат на посетеноста. Авторот ги категоризира мотивите за блогирање (љубопитност/помодарство, издувен вентил, искажување ставови), па вели:
Во контекст на ваквата поделба, преку мојот случај се покажа дека квалитетот на текстот и времето поминато за негова подготовка е обратно пропорционално со бројот на посетите и коментарите. Односно колку поиздржан текст, толку помалку интерес кај публиката.
Заклучокот е дека тривијализацијата, краткоста, едноставноста на јазикот и познатоста на темите позитивно влијаат на посетеноста. Авторот препорачува „најдобро е своите лични ставови преточени во текст да ги миксате со тривијални теми“.

Целата анализа звучи многу логично и ја препорачувам како појдовна точка за критичко размислување, со забелешка дека примерокот постови е многу мал и ограничен, дека нема споредба меѓу повеќе блогови на повеќе сервиси, како ни квантитативни и демографски податоци за испитуваната популација, со помош на кои би можело да се определи валидноста.

Детална агенда за конференцијата е-Општество.Мк (e-Society.Mk)

На нејзиниот веб-сајт е објавена детална верзија на агендата (нацрт) на конференцијата е-Општество.Мк. Доколку сте заинтересирани за учество, не чекајте до крајниот рок на 6.11 да се пријавите. За некои од настаните, бројот на места е ограничен.

24 October 2006

Мал фонт => мал ефект

Дарко од Комуникации ми посочи еден текст (Small Fonts Spell Trouble Online) со вест дека најновото истражување извршено во Норвешка потврдило дека користењето мали фонтови ја намалува продуктивноста на корисниците. Препорачлива големина е 12 или 10.

Стипе Месиќ низ Скопје. Внимавајте на пајакот

Стипе Месиќ, еден од главните балкански фраери, денес го посетува Скопје. По рутата по која треба да помине има распоредено силно полициско обезбедување.

Внимавајте како паркирате низ центар!

На другар ми, кој бил паркиран прописно, но во близина на рутата, сепак му ја собрале колата со пајак. Требал да плати 2000 денари да му ја вратат (цена на услугата на пајакот), а не морал да плати уште 1500 денари колку што би изнесувала казна за непрописно паркирање.

Нова сорта на атеизам - фундаменталистички и мисионерски

Уредникот на „Вајерд“ Гери Вулф има преземено лично патување по врвиците на новиот вид атеизам, чии промотори без срам и перде се залагаат за целосно отфрлање на верувањата во натприродното од нашата цивилизација. Текстот дава пресек на различните фракции и важни автори од ова движење, како и за неговиот однос со тврдите и меките теисти (верници).

Аргументациите од текстот може да бидат од полза во при дебатата околу не-воведувањето веро-наука во јавното образование:
  • „До кој степен треба децата да ги сметаме за сопственост на родителите? Едно е да кажеш дека луѓето смеат да веруваат во што сакаат, но дали смеат да ги наметнуваат тие верувања на нивните деца? Дали општеството треба да интервенира? Што кога децата се присилуваат да веруваат во очигледни невистини?“
  • Всушност, тој се залага дека неутралното образование за сите религии во светот, базирано на научниот метод, треба да биде обврзно во училиштата. Најпосле, тој вели, „ако треба на децата да им ги врзете очите за да обезбедите дека ќе се вклопат во нивната религија кога ќе пораснат, таквата вера треба да исчезне“.
  • улогата на религијата и политиката: „Секој знае дека атеист не може да добие на избори.“
  • а и нешто што може да ја заинтересира и Би: „Дали интелигентните роботи ќе бидат религиозни?“

23 October 2006

Авиони и мрежи - екстраполација

Брус Стерлинг ги комбинира своите омилени теми - за мрежите и млазните авиони (Barbarians at Gate 8), раскажувајќи за визијата на британскиот адмирал Крис Пери, кој шпекулира за верзија на иднината „околу 2030 година, во која војната против тероризмот сеуште се влече, а терористите победуваат“, бидејќи благодарение на глобализацијата, имигрантите наместо да бидат асимилирани, го задржуваат својот културен идентитет.

Насловот на текстот секако, буди сеќавања на песната „Чекајќи на варварите“ од К. Кавафи.

Повеќе информации за конференцијата е-Општество.Мк

Надоврзување: на официјалниот веб-сајт на Втората меѓународна конференција е-Општество.Мк е поместена агендата со распоред на сесиите, работилниците и другите настани. Накратко, планот е следниот:
  • 15 ноември - пленарни сесии:
    - Најдобри пракси за изградба на институцинална рамка
    - Е-владеење и граѓанско учество
    - Слободен пристап до информации и заштита на лични податоци
  • 16 ноември - пленарни сесии:
    - Е-трговија, компјутерски криминал и законска рамка за сигурност
    - Влијание на новите медиуми на применетите политики (digital switchover)
    - Изградба на синергија: Премостување на јазот еЕУ-еЈЕЕ (тркалезна маса)
  • 17 ноември - работилници:
    - Интернет-новинарство
    - Родова евалуација на ИТ проекти
    - Слобода на изразување на интернет
    - e-Пристапност: Вклучување на луѓето со посебни потреби во информатичкото општество
    - Авторски права во дигиталната ера
    - Слободен софтвер
    + концерт: групата „Звук брода“ од Загреб, која објвува под Криејтив комонс
Сите активности ќе се одржат во „Холидеј ин“, освен концертот кој ќе биде во „Точка“.

Доколку сте заинтересирани за учество, пријавете се преку формулар на самиот веб-сајт, или со пополнување и испраќање документи со пријава. Котизацијата ја покриваат спонзорите, но поради ограничениот број места учеството на определени настани од конференцијата ќе биде на принцип кој попрво се пријави, тој (таа) добива резервација.

Благодарност до Комуникации, Панта реи и Археолошки дневник за поддршката.

22 October 2006

Кибицер - Том Хенкс, Анета В. - Мег Рајан

Извор на оригиналната слика: некој кинески блог.

Ај белким ќе тргне работава со помошта за Кибицер, што си ја бара саканата преку блогот свој. Ако сте блогер/ка, ставете пост за ова со линкови до другите од клапата, како што тоа го сторил ВББ.

Е сеа, иде бест-кејс сценарио: Зале и Анета се наоѓаат и тако томе, ама и целата МБЗ може да има полза. Слично како оној со црвената спајалица, тој после пишува книга, или ја продава приказната во Холивуд или овде се прави филм на темата (прв блогоцентричен филм во светот, а можеби и втор догма-филм во Македонија) па Холивуд ги откупува правата и прави римејк. „Јув гат мејл 2: Гат блог - вил лав“ (Got Blog - Will Love*). Па нели и најновиот филм на Милчо е урбана драма. А тоа е баш за 21 век!

Не само што Том Хенкс и Мег Рајан може пак да ги играат главните улоги, туку за да биде филмот интересен освен главната приказна ќе има и многу микроприказнички за блогерите кои ја пренеле информацијата и се вклучиле во потрагата. Нешто како „Пи“ или „Продавачи“, со галерија интересни ликови, само без Џеј и Сајлент Боб. Барем за оние пофотогенични што се, или што се женски. Еврибади винс.

* Homage to Have Space Suit-Will Travel by Robert A. Heinlein

Фикомирање да, но да не ги заборавиме фајромирање и фајромизирање

Dont you fikom meТреба да се оддаде признание на Владо од „Канализација“ што официјално го врти вниманието на јавноста на појавата на нов збор во нашиот јазик:
Фи - комира значи да продадеш ист стан на повеќе луѓе. Тоа да го правиш подолг период, а на никој да не му е гајле. Сепак, подолго фи-комирање кошта затвор.
Како што објаснува Владо, значењето на глаголот е пошироко, а се однесува на сите ситуации во кои некој е излажан дека нешто му е наменето само нему, а всушност било продадено и на многу други.

Уште да се договориме дали подобар превод на претходниот нов збор, настанат од слоганот „Don't you FYROM me“ е фиромизира, фајромизира, фиромира или фајромира.

Сите дела на Дарвин на интернет, со и без линк


„Вест“ има пренесено вест од „Ројтерс“ во која се раскажува дека сите дела на Чарлс Дарвин се објавени на интернет. Полезно за сите заинтересирани за еволуцијата.

Од овие две вести, оригиналот го содржи линкот до веб-сајтот (darwin-online.org.uk), а македонскиот превод не.

21 October 2006

Што ќе ни е образование, природно сме си паметни

„Вест“ известува за извештајот на УНИЦЕФ кој укажува дека Македонија е неписмена, a нивото на способности на учениците е во опаѓање.
Во Македонија дури 34% од учениците не се запишуваат во средно школо и се задоволуваат само со основното образование.
Во веб-изданието на весникот не е поместен инсертот кој укажува дека околу половина од работната сила ни е без завршено средно образование.

Оригиналното известување за медиумите на УНИЦЕФ содржи и линк до извештајот (Innocenti Social Monitor 2006), кој може да се симне во ПДФ-формат на англиски и руски.

Анета В., јави му се на Зале, односно Кибицер

Познавате некоја Анета В.? Прашајте ја дали има другар од средно што испаднал малку смотан и не ѝ го побарал бројот кога се виделе неодамна во ГТЦ, но сепак е симпатичен и можеби вреди да се проба ш-б-б-к-б-б. Особено што така ќе влезе во историјата на интернет во Македонија, а може ќе стане и јавна личност. Без зезање.

Ако одговори потврдно, нека јавне бела кобила и нек му се обрати на Кибицер. Ја бара чоекот. За оваа романтична и урбана иницијатива дознав преку Рибаро. Порака до Кибицер: распрашај се и по луѓе, особено тие што оделе во средно заедно со вас. Може знаат. Или најди ја адресата на мајка ѝ преку дневниците од средното, што се вадат на 5, 10, 15-годишнини од матурска.

20 October 2006

Пример за грл-пауер: турбофолк песната „Гачице“

Ерика се жали на патријахалните предрасуди поврзани со секс на прва вечер. Па такви работи се надминуваат дури и кај турбофолкерките.

Стручњаците за родови односи што ги консултирав, песната за долна облека оставена кај машкиот партнер (Goga Sekulić: Gaćice) ја сметаат за жив пример за еманципација, наспроти минатата мода (Tina Ivanović: Bunda od nerca) да се слави занаетот спонзоруша или песни за жените што можат сè да поднесат (Slavica Ćukteraš: Prevari me; Seka Aleksić: Dođi i uzmi me), само да не бидат оставени сами.

Благодарност до ТВ БТР што преку нивната СМС-емисија овозможуваат увид во најновите главни текови на популарната култура.

Сте ја пробале „Rome Total War - Alexander“?

Rome on AlexanderСлично како и „Алан Форд“, основната верзија на „Рим: Тотална војна“ го признаваше посебниот антички македонски идентитет. Дали некој го има пробано нејзиното продолжение, кое е на тема походите на Александар?

„Роум“ (што би рекле ние што одиме „со каро по стрито“) е најдобрата стратешка видео-игра направена досега, со одличен баланс меѓу стратегија и тактика. А ги спојува и поджанровите на стратегија на потези (turn-based) и во реално време (realtime).

Alexander + companionsГреота е играта на ова ремек-дело да се загадува со читови, кога на официјалниот сајт има збирка од неколку тактички финти кои не се очигледни. На пример, онаа како да се послужиш со чумата како средство за био-хемиска војна: преку праќање на свој шпијун прво во заразен град, а потоа на екскурзија кај противниците.

Критиките за за „Александар“ се поволни, иако на ГејмСпот нагласуваат дека елементот на дипломатија е минимизиран, за сметка на потребата да се брза да се заврши мисијата пред неговата рана смрт.

Препорака: Парнократија

Плаќам парно, а тие со мене си играат „топло-ладно“. Повеќе ладно. Затоа ми изгледа дека „Парнократија“ е една од најважните работи што ја прочитав неделава.

Постојат македонски блогерки со слики: Марија(та)

ПријателиПреку реферерите дознав дека Рибаро ме споменал во една дискусија на тема „Секс, правете го сè почесто и повеќе“ (се согласувам! во таа област, квантитетот + IQ => квалитет) оти Марија(та), домаќинката на блогот објавува нејзини фотографии на нет.

Имено, јас неодамна се пожалив на тоа што „ретко кои од македонските блогерки ставаат доволно свои фотографии на своите блогови“.

Фотогалеријата на Марија е светол пример, иако според пренагласеното рекламирање на нејзиниот блог ми личи дека има некаква подлабока поврзаност меѓу неа и веб-сајтот „Пријатели“. Ќе има уште?

19 October 2006

Не им се компјутерите криви на стриповите

Коинцидентно во ист ден прочитав два текста во кои прилично технофобно се ИКТ посочуваат како непријатели на стриповите. Првиот од „Дневник“ (19.10.2006) за Ване Трајков, стрип-ентузијаст од Велес:
Со носталгија Трајков зборува за времињата кога стрипот бил актуелен, а сега компјутерите го истиснале на маргините. За него е неразбирливо како денешните млади се откажале од задоволството да го почувствуваат мирисот на хартијата и бојата од стрипот, да го читаат пред спиење и да се бидат со него, и повторно да го препрочитаат, да се внесат во животот на јунаците, кои само во стриповите се непобедливи.
Нешто слично прво навести Сатанокио, во постот „Стрип култура (прв дел)“:
Што е тоа што ги уби стриповите во Македонија? Модернизацијата, технологијата, компјутерите? Децата/младите имаат друга забава денес. Никој не чита стрипови. Секоја чест на исклучоци.
...ама потоа се повлече чекор наназад низ коментар на истиот пост:
Да не се разбереме погрешно, не ги кривам компјутерите. Само прашав/дадов заклучок.
Во истата дискусија, јас претходно истакнав дека:
Не се криви компјутерите - тие токму помагаат оние што сакаат да читаат стрипови да ги најдат, како тебе. Македонија немаше многу силна автохтона стрип-продукција. Повеќето изданија беа од другите делови на бивша Југославија. Кога се распадна СФРЈ, пазарот се фрагментираше, некои врски се прекинаа, а некои од тие издавачи згаснаа. Младите немаа соодветна понуда, затоа се преориентираа на други медиуми.
Како аргумент, ја препорачувам збирката на веб-стрипови што ја препорачува еден од најважните современи стрип-автори, Скот мек Клауд. Приказните се далеку од еднодимензионалните црно-бели ликови и приказни по кои копнее Трајков во горенаведениот цитат. На пример, ѕирнете го „Пирсинг“, стрип без зборови од Дејвид Гедис.

Облечете го Рамбо Амадеус

Флеш-апликација во стилот на „Цицин кутак“ од „Политикин забавник“, со Рамбо Амадеус во главната улога..

18 October 2006

„Не лути се човече“ во Флеш - репринт

Не лути се човече.аНТИ препорачува една верзија на играта „Ризико“ изведена во Флеш.

Тоа ме потсети дека и јас еднаш препорачав една верзија на „Не лути се човече“ во Флеш. Па дури го ставив и линкот во блогрол, до толку ми се свиде.

Ептен е блиска до „оригиналот“, за разлика од (квази) Ризикото. Кога сме веќе кај името, буквален превод на оригиналното име е „Ризик“ (Risk). Не ми е јасно зошто ја преименувале „Ризико“, кое ми звучи како членувана форма на прилепски дијалект. А за да се преведе со „Ризикот“, оригиналното име треба да биде членувано исто (The Risk).

Океаните ни се во опасност! Еј!

Опрости ми КатринКај Би ја прочитав листата на де факто цензурирани стории, односно нешта за кои медиумите не сакаат да пишуваат. Без разлика што немаме море, и ние итекако ќе ги почувствуваме последиците на оваа појава (набрзински превод од првобитниот напис):
Нивото на морињата расте. Арктикот се топи. Владите одбиваат да признаат дека се случува глобално затоплување додека брзаат да го истражат океанското дно надевајќи се дека ќе заграбат права на користење нафта, гас, злато, дијаманти, бакар, цинк и последните неискористени подрачја за рибарење на планетата...

Проблемот е дека ако светскиот океан, кој опфаќа 70.78 проценти од нашата планета е во опасност, сите сме зафркнати. Според написот на Џулија Вити од „Мадер Џоунс“ (март/април 2006) истражувачите од Скрипс институшн оф осеанографи и од Националната лабораторија Лоренс Ливермор во 2005 го откриле „првиот јасен доказ дека светскиот океан се затоплува“. Меѓу другото „највисокиот слој од половина милја во последните 40 години е затоплен драматично поради гасовите кои го креираат ефектот на стаклена градина предизвикани со човечка активност“.
Во написот истражувачите бараат Владата на САД да отпочне масовен научен проект да утврди дали е воопшто можно да се спречат последиците од оваа ситуација, но новинарот заклучува дека таа институција досега не подигнала ни прсте во таа насока. А нашава? А вие?

Отворено писмо до Пинчер Барнет

Забележав дека повеќето постови на блогот Пинчер Барнет се со наслов „Јавниот дневник на Пинчер Барнет“.

Би било поинтересно за публиката, особено за оние кои може да дојдат од агрегатори како Дигимак блог, кога насловите на постовите би имале директна поврзаност со активноста во содржината. Ова се одразува и на употребливоста, оти ваквите наслови имаат помала видливост и кај машини за пребарување, а посетителите мора да вложат екстра напор за да видат што има во новиот пост.

Ако веќе е многу важно да стои името Пинчер Барнет во насловот, може да бидат и како холивудските филмови од на времето „Пинчер Барнет оди во самопослуга“, „Пинчер Барнет фаќа убава девојка“ итн.

Но поефикасно е да не стои, оти името на блогот автоматски се додава во насловите (ХТМЛ-тагот тајтл) на секоја индивидуална страница од блогот, па нема потреба да се дуплира. Исто би било поефикасно слоганот на блогот да не биде дел од насловот, туку да се премести, оти ја пребукира микросодржината (microcontent - вити точка 6 од текстот на Нилсен).

17 October 2006

Пантиќу, Сингапурќани: Од блогерка до фото-моделка

Венди Ченг, млада сингапурска блогерка станала фото-моделка за конфекциската фирма „Локален бренд“.

Наводно, сопственикот на фирмата кога ја сретнал и чул дека е блогерка, „ја земал“ за заштитно лице. Можеби помогнало тоа што таа има 21 година... и просек од скоро дваесет илјади посети дневно на блогот.

Ме чуди што ретко кои од македонските блогерки ставаат доволно свои фотографии на своите блогови. А има многу привлечни моми меѓу нив!

Најава: конференција е-Општество.Мк во Скопје 15-17 ноември

Со цел подигање на јавната свест и свеста на носителите на одлуки, добивање на поквалитетна легислатива и креирање на соодветни применети политики преку широко граѓанско учество, како и поттикнување на регионална соработка како елемент на евроинтеграцијата...

Second international conference e-Society.Mk
...Фондацијата Метаморфозис ја организира Втората меѓународна конференција е-Општество.Мк, која ќе се одржи од 15 до 17 ноември во Скопје, со поддршка на Мисијата на ОБСЕ во Скопје, Институтот отворено општество и Претставникот на ОБСЕ за слобода на медиумите.

Повеќе информации за конференцијата се достапни на нејзиниот сајт (www.e-society.org.mk), а во најскоро време ќе биде овозможено заинтересираните да се пријават за учество.